تيتة لارا أخدت نفس عميق 

وبتنهيدة قالت، 

‘يا مسهل … يا معين … سلالم العمارة كتير .. 

والطريق للشقة لسه طويل’ 

الفارة لارا ساكنة في اخر دور في عمارة عالية مليانة جيران وزي ما متعودة، نزلت تشتري طلبات من السوق بس فيه مشكلة .. العمارة مافيش فيها اسانسير وتيتة لارا سنها كبير فطلعت على مهلها وفي السكة قابلت جيرانها الحلوين!

بنص جميل كله سجع زي ما اتعودنا من الكاتبة ريهام شندي، بنطلع  مع الفارة لارا أدوار العمارة وبنتعرف على جيرانها واحد واحد وهما بيساعدوها بمنتهى الحب. عرفتنا ريهام على كل جار بطريقة مختلفة زي المعزة نسمة وهي خارجة ومتشيكة والخروف معروف اللي كان بينضف بسطة بيته والنساس عباس اللي كان بيركب لباب شقته ترباس ومع كل دور، بؤجة تيتة لارا اللي شالية فيها حاجاتها من السوق بتخف لحد ما بتوصل لشقتها وساعتها بتكتشف اللي حصل!

 الكتاب ممتاز للقراءة الجهرية والحكي للأطفال بفضل اللغة المصرية السلسة والسجع المدروس بالإضافة للمشاهد الكوميدية وتوفير مساحة للهزار واحنا بنقرا القصة مع الأطفال.

أضافت رسومات بسمة حسام متعة للكتاب من أول بلكونة تيتة لارا وهي قاعدة في مع جدو وكم التفاصيل اللي في بلكونة معظم بلكونات الشقق القديمة ومع كل دور فيه تفاصيل مختلفة حسب شخصيات السكان بالرغم من ثبات مشهد سلم العمارة. الرسومات مليانة تفاصيل مناسبة لخلق مستويات مختلفة ممكن نستغلها لتحفيز فضول الطفل وخلق عوالم خيالية جديدة لكل شخصية من الجيران.

استمتعنا جداً بعلاقة الجيران الودودة واللي بتساعد بعض من غير ما يتقال ده بشكل مباشر وده من أحب الطرق لينا في تناول أي رسالة للأطفال. وعلى الرغم من أن الكتاب مكتوب بالعامية المصرية إلا انه ممكن قرايته بلهجات ومستويات لغوية متعددة.

“الفارة لارا  وجيرانها في العمارة” من إصدار كتب عصفورة لعام 2023 المتخصصة في كتب الأطفال بالعامية المصرية. مناسب لسن 3+.