#كيكي_ورجليه_الصغيرة_جداً 

“بس النهاردة بالغلط دلق نص برطمان العسل في الكاكاو. ولما ذاقه كان طعمه … لذيذ” 

كيكي شخص بيحب يعمل كل يوم نفس الحاجات بنفس الطريقة وده علشان هو مرتب حياته بطريقة معينة لأن عنده حاجة مش زي كل الناس. كيكي لما اتولد وبدأ يكبر، كل حاجة كبرت وطولت إلا رجليه؛ فضلوا صغيرين جداً. لما كان صغير، الموضوع ماكنش فيه مشكلة كبيرة، بس لما كبر، بقى محتاج يلاقي حل علشان مابقاش عارف يمشي كويس. 

وبما إن كيكي بيحب يخترع ويلاقي الحلول، فضل يحاول كذا مرة وبكذا طريقة… الموضوع  خد منه وقت طويل بس في الآخر لقى الحل ومن ساعتها وهو مش بيغير حاجة؛ ما هو ما صدق إن الدنيا ظبطت معاه !  لحد ما في يوم وهو بيمشي “بوزو”، كلبه وأعز أصحابه، في نفس الطريق بنفس الطريقة زي ما هما متعودين كل يوم؛ حصلت حاجة خلت بوزو يمشي في طريق مختلف تماماً. يا ترى ايه اللي خلى بوزو يعمل كده؟ وكيكي اتصرف ازاي مع كل الحاجات اللي قابلها واللي فيها كتير من مخاوفه؟ 

في قصة جميلة مكتوبة ومرسومة بعذوبة شديدة، بتاخدنا كل من إيمان النجار وصوفيا سمير أحمد في رحلة بنعيشها مع كيكي من أول حياته المستقرة اللي وصلها بعد الكتير من المحاولات لغاية ما بيضطر انه يواجه التغيير والمجهول. في الرحلة دي بنتعاطف مع كيكي بس كمان بنضحك بفضل خفة الدم اللي اتوظفت توظيف هايل في القصة بأشكال مختلفة سواء عن طريق الكتابة أو عن طريق الرسم. الإخراج الفني للكتاب جميل جداً. الرسومات انسيابية والألوان والخطوط رايقة بالإضافة إلى خلق ديناميكية مع الأحداث من خلال تغيير المنظور والتلاعب بفونت الكلمات لتوظيفها مع الرسم لإحياء النص. ده كله خلانا نعيش داخل القصة اللي أخدت منحنيات مختلفة لما كيكي خرج من الروتين اللي متعود عليه. مثلا بنلاقي رسومات من منظور كيكي نفسه، كأننا بنشوف الحاجات بعينيه هو زي  لما بيقع على الأرض، وفي أجزاء تانية من القصة، بنشوفها بعيون الراوي أو من خلال حركة بوزو اللي هي المحرك الرئيسي للأحداث في الجزء التاني من القصة.  

من خلال حدوتة كيكي، إيمان وصوفيا قدروا يورونا ازاي ممكن نتعامل مع المغامرات والمفاجآت اللي بتحصل في حياتنا وان ممكن ده يخلينا نكتشف مصادر قوة ماكناش نعرفها عن نفسنا أو تودينا لحتت جديدة من العالم نكتشف فيها حيوات مختلفة. 

كتب كتيرة مكتوبة ومرسومة حلو للأطفال، بس كتب قليلة نقدر نقول اننا بنرشحها كمان للكبار زي الكتاب ده. كتاب عابر للزمان والمكان والسن، بيقدم أفكار فلسفية بمنتهى البساطة واللذاذة ومن غير الوقوع في فخ التنظير المباشر أو استخدام الأوصاف والكلمات النمطية. 

استمتعنا جداً بقراءة “كيكي ورجليه الصغيرة جداً”. الكتاب مكتوب بالعامية المصرية وتجربة إصداره فريدة بما أن صوفيا بدأت برسم اللوحات وبعدين مع إيمان كتبوا النص وطوروا الأفكار مع بعض ونشروه نشر ذاتي سنة 2023. مناسب لسن 3+ لحد 99 

تابعوا صفحة الكتاب على الإنستجرام عشان تعرفوا لو إيمان وصوفيا هيعملوا جلسات حكي قريب وكمان عشان تعرفوا ممكن تشتروا الكتاب منين.