“اسمي كوكا، أنا كابوريا مش عادية! باحب البحر زي عينيا، و فروكة همي نضافة ليك وليا، نحمي حياتنا البحرية!”

كوكا كابوريا صغنونة قد الزبيبة بس بتجري بسرعة رهيبة. و مرة سمعت صوت بينده “ساعدوني” ولقت هنية السلحفاة متعلقة وسط حلقات بلاستيك. يا ترى هتعرف كوكا تنقذ هنية؟ و ايه القرار اللي هتاخده كوكا بعد كده؟ و يا ترى ايه دخل نونو في قصة كوكا وهنية؟
من نفس الفريق اللي قدم لنا كتاب “هنية وفكرتها الذكية”، بنتعرف على قصة لطيفة تانية عن حماية البيئة البحرية بالعامية المصرية.

بتحكي لنا سلمى البنا بنص شيق مسجوع عن كوكا الكابوريا الصغيرة السريعة والذكية وإزاي بتساعد صاحبتنا هنية السلحفاة اللي اتعرضت لموقف صعب بسبب القمامة على الشاطئ.  بنشوف إزاي كوكا بتساعدها وإزاي بتشجع نونو (من كتاب الرسامة نونو) والأطفال التانية على المشاركة في الحفاظ على نظافة البحر.

عكست رسومات سارة مرعي خفة ظل النص ونقلتنا من أعماق البحر للشواطيء الذهبية بألوان حيوية وشخصيات الكائنات البحرية الظريفة.

في نهاية القصة، بتشرح كوكا تأثير البلاستيك على البيئة البحرية وبتطلب مساعدة الصغار وكمان فيه نشاطين في آخر الكتاب ده غير خاصية سماع القصة بصوت الكاتبة من خلال كود عند شراء الكتاب.

الكتاب من إصدار كتب عصفورة لسنة 2023، دار النشر المتخصصة في كتب الأطفال بالعامية المصرية ومناسب لسن +3. 

الكتاب متوفر من دار النشر عبر هذا الرابط أو في المكتبات وعلى المواقع المتخصصة.
يمكنكم الإطلاع أيضا على قائمة حادي بادي التي تحتوي على ترشيحات لمجموعة متنوعة من كتب الأطفال التي تتناول قضايا البيئة.