س وج حادي بادي مع حدوتة

مبادرة حدوتة عبارة عن نادي قراءة للأطفال لحكي الكتب بالعربي والإنجليزي من تأسيس آية ضرغام ومها فتحي. فريق حادي بادي سأل آية ومها شوية أسئلة وجاوبوا علينا من واقع خبرتهن.

*يعني ايه نادي قراءة وفين نلاقي حدوتة؟*

نادي قراءة عبارة عن مجموعة بتحب القراءة وبتختار كتب تقراها مع بعض وتناقشها. احنا طبقنا المفهوم ده عشان نحكي كل أنواع الحواديت للأطفال والأهل. بنحاول نختار دايما الحواديت اللي وراها فكرة وساعات بنركز على موضوعات معينة زي مثلا الشعر الكيرلي والأكل الصحي وانفصال الأهل والطلاق. بننظم جلسات الحكي في المكتبات والمدارس والحضانات وبنعلن عنها على صفحتنا حَدُّوتَة بس طبعا دلوقتي ما فيش جلسات بسبب الحظر.

*ايه اكتر سن بيتجاوب مع الحكي ؟ وايه اكتر كتب كل سن بيحبها؟*

علاقة الأطفال بالكتاب بتبدأ من أول سنوات عمرهم وعلاقة الأطفال باللغة بتبدأ بحبهم وشغفهم لسرد وقراءة الكتب باللغات المختلفة. عشان كده احنا بنحكي بالعربي والانجليزي. من سن سنة و نصف ل٦ سنوات، لقينا الأطفال بيحبوا الكتب إللي فيها أصوات مختلفة وحيوانات. ومن سن ٧ لعشر سنوات، بيحبوا الكتب اللي تخليهم يفكروا واللي بتلمس موضوعات بيمروا بيها في أيامهم العادية. وكل الأطفال في أي سن بتحب الكتب اللي بتضحك -:)

*طيب ايه الكتب المناسبة للسن الصغير من الولادة لحد ٣ سنوات؟*

من خلال تجربتنا في حدوتة مع السن الصغير، لقينا أن الطفل بينتبه أكثر لما يستخدم أكثر من حاسة واحدة وقت القصة. يعني يسمع صوت مامته أو باباه في حكي القصة مع سماع أصوات مختلفة من الكتاب، لمس الكتاب اللي فيه خامات مختلفة، والنظر للصور الملونة. كمان الكتب اللي الكلمات فيها قليلة و/أو مسجوعة والرسومات بسيطة وبتمثل حاجات وأفعال من حياة الطفل اليومية وكمان الشخصيات المحببة والحيوانات مفيدة جدا عشان بناء المفردات وتنمية اللغة. الصراحة كنا في رحلة بحث لا تنتهي عن كتب جذابة بالعربي وجودتها عالية من حيث المحتوى والرسومات للسن الصغير ولقينا ضالتنا في معرض القاهرة للكتاب مع دار ربيع للنشر من سوريا. كتبهم حلوة جدا وجودتها عالية:

https://www.instagram.com/p/B76SOvShBuD/ .

*ايه النصايح اللي ممكن تقدموها للأهل عشان الحكي للأطفال ؟*

القارئ للقصة أو الحكواتي سواء أم أو أب أو مدرس لازم يشوف القصة من وجهة نظر الطفل ويحاول ينزل لمستواه ويظهر حماسه وانبساطه خلال الحكي. مهم جدا انه يغير الأصوات مع الشخصيات. نقطة مهمة كمان هي إن القراءة متعة مش واجب. يختاروا وقت هادئ كل يوم للقراءة مع بعض ويكون في الروتين كحاجة للتسلية واللعب زيها زي اي حاجة ممتعة للاطفال. ويحاولوا دايما يقروا لهم كتب عن الحاجات اللي بيحبوها. من أول الكتب اللي فيها كلمة واحدة وصورة كبيرة تعلم الألوان والأشكال وأسماء الأشياء لغاية كتب نتعلم منها قيم ومعاملات. واهم حاجة يعرفوها ان السن الصغير مش بيزهق من التكرار يعني ممكن نقرا القصة كذا مرة بطرق مختلفة مرة احنا نقرا ومرة نخليهم يقروا ومرة نمثل أحداث القصة مع بعض.

*نفسكم تشوفوا كتب عربي أكتر بتغطي اني موضوعات؟*

الكتب العربي مش ناقصها موضوعات هي ناقصها بس التنفيذ أو مخاطبة حقيقية لاهتمامات الطفل العصري ولغته. الرسومات محتاجة تطوير أكيد كمان وممكن يبقى فيها مجسمات زي الpop-ups مثلاً…نفسنا كمان يبقي في جزء من حس الفكاهة غير المفتعلة في الكتب الموجهة للطفل بالعربي.

*ايه خطتكم للفترة الجاية ؟*

للأسف جلسات الحكي واقفة في الوقت الحالي. نتمني الوضع يستقر ونرجعها تاني قريباً لأن الحكي أونلاين مش بنفس تأثير الجلسات. بنشتغل دلوقتي علي تحضير محتوى أونلاين موجه للأهل لتشجيعهم على القراءة لأولادهم وكيفية الحكي المناسب لكل سن. وكمان بنشتغل على كتابة كتب وأول كتاب لنا بالإنجليزي على وشك الصدور. وبدأنا في الكتاب التاني اللي هيكون بالعربي.

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s